Siku mbili baada ya Rais William Ruto kukamilisha ziara yake ya siku nne eneo la Gusii, mgombeaji urais wa Jubilee, Dkt Fred Matiang’i, amerejea katika eneo hilo akisema ziara ya Rais haitabadilisha msimamo wa kisiasa wa jamii ya Abagusii.
Matiang’i alisema wakazi wamechoshwa na ahadi ambazo anadai hazijatekelezwa na serikali ya Rais Ruto, hivyo hawako tayari kuachana na upinzani kwa sababu ya fedha au zawadi wanazopewa na wanasiasa.
Akikosoa ziara ya Rais, aliyekuwa Waziri wa Usalama wa Ndani alisema siasa za Kenya zimegeuzwa kuwa mnada ambako viongozi wenye fedha nyingi wanadhani wanaweza kununua uungwaji mkono wa wananchi.
“Mioyo, nafsi na dhamiri za watu wetu wa Gusii haziuzwi. Rais alikuwa hapa mapema wiki hii akigawa pesa, kama inavyoonekana katika video zinazosambaa mitandaoni. Watu wetu hawawezi kununuliwa,” alisema.
Alisema wananchi wanataka maendeleo halisi na kuboreshwa kwa maisha yao, badala ya viongozi kujaribu kuwashawishi kwa hongo na ahadi zisizotekelezwa.
Matiang’i alisema hayo Ijumaa alipohudhuria mazishi ya mjomba wake, Mzee John Mboga Nyaboga, eneo la Manga, eneobunge la Borabu, Kaunti ya Nyamira.
Alisema hatamjibu Rais kwa matusi, akisisitiza kuwa kampeni zinapaswa kufanywa kwa heshima bila vitisho wala vurugu. Pia aliunga mkono wito wa maaskofu Katoliki wa kuwepo kwa kampeni za amani na umoja.
Kiongozi huyo wa Jubilee alikosoa serikali kwa kile alichokitaja kuwa ufisadi na kushindwa kudhibiti wizi wa mifugo katika eneo la Gusii.
